Toshkent viloyatidagi bojxona postlaridan biri yanada kengaytiriladi 

Toshkent viloyatidagi “G‘ishtko‘prik” bojxona posti yanada kengaytiriladi. Bu haqda viloyat hokimligi axborot xizmati xabar berdi. 

Unga ko‘ra, Toshkent tumani “G‘ishtko‘prik” agrofirmasi massividagi 197q, 198q, 200q-konturlarda joylashgan 1,81 gektar qishloq xo‘jaligida foydalanilmaydigan davlat zaxirasidagi yer maydoni “G‘ishtko‘prik” chegara postini kengaytirish va loyiha hujjatlari asosida qo‘shimcha bino-inshootlar qurish uchun ajratildi. Bu bo‘yicha Toshkent viloyati hokimi Zoir Mirzayev tegishli qarorni imzoladi.

Shuningdek qarorda, mazkur hududda joylashgan muhandislik tarmoqlarini ko‘chirish yoki muhofaza hududini saqlab qolish ishlarini amalga oshirish belgilandi.