Qashqadaryoning tog‘li hududida joylashgan qishloqqa salkam 1 metr qalinlikda qor yog‘di
Qashqadaryo viloyati Shahrisabz tumanidagi “Ko‘l” qishlog‘iga yog‘gan qor qalinligi 90 santimetrgacha yetdi. Bu haqda tuman hokimligi matbuot xizmati xabar berdi.
Ma’lum qilinishicha, tog‘li hududda joylashgan “Ko‘l” MFYda besh kundan beri qor yog‘moqda. Yo‘l chetlari va qatnov yo‘q joylarda qorning qalinligi 90 santimetrga yetgan.
“Bu vaziyat aholining turmush-tarziga salbiy ta’sir etayotgani yo‘q. Tuman hokimligining tashabbusi bilan aholining ehtiyojlari o‘rganilib, yetarli miqdorda arzonlashtirilgan ko‘mir yoqilg‘isi yetkazib berilgan. Ijtimoiy soha obyektlari ham barqaror ishlamoqda”, — deyiladi xabarda.
Shuningdek, tuman hokimligi tomonidan yoqilg‘i zaxirasi shakllantirilib, qishloq aholisi tuman markazidan uzilib qolmasligi uchun yo‘llar maxsus texnikalar yordamida muntazam qordan tozalanmoqda.
29-yanvar kuni O‘zbekiston Favqulodda vaziyatlar vazirligi Taxtaqoracha dovoni kuchli qor yog‘ayotgani sababli avtomobillar harakati uchun vaqtincha yopilganini ma’lum qilgandi. Dovon yo‘li qayta ochilishi bo‘yicha qo‘shimcha ma’lumot taqdim etiladi.
