Turkmaniston Bishkek IESdagi avariya munosabati bilan Qirg‘izistonga yordam berish uchun suyultirilgan gaz jo‘natadi

Turkmaniston Qirg‘iziston Respublikasiga insonparvarlik yordami sifatida 2 ming tonna suyultirilgan gaz yuboradi, deb xabar bermoqda Alty Asyr telekanali.

“Turkmangaz” davlat konserniga yo‘llangan tegishli farmoyishni prezident Serdar Berdimuhamedov imzolagan.

Hujjat, unda aytilganidek, turkman xalqi nomidan Qirg‘iziston Respublikasi energetika sohasidagi mavjud vaziyat munosabati bilan qirg‘iz xalqiga gumanitar yordam ko‘rsatish maqsadida imzolangan.

2-fevralga o‘tar kechasi Bishkekdagi (Qirg‘iziston) issiqlik elektr stansiyasida avariya yuz bergani, oqibatda isitish qozoni portlagani haqida xabar berilgandi. Jarohatlanganlar bor.

Qirg‘iziston poytaxtida issiqlik va issiq suv ta’minotida qiyinchiliklar yuzaga keldi.

Turkmaniston Tashqi ishlar vazirligining xabar berishicha, bir kun avval Turkmaniston tashqi ishlar vaziri Rashid Meredov Qirg‘iziston Respublikasidagi hamkasbi Jeenbek Kulubayev bilan telefon orqali muloqot qilgan.

Eziz Boyarov