Istanbulda sud binosiga kiraverishda erkak va ayol otishma uyushtirdi (video)
Istanbuldagi sud binosiga uyushtirilgan qurolli hujum oqibatida 5 kishi jarohatlandi. Otishma uyushtirgan erkak va ayol yo‘q qilindi. Bu haqda Hurriyet xabar berdi.
Ma’lum qilinishicha, ikki noma’lum shaxs Chag‘layan sud binosiga kiraverishdagi xavfsizlik postiga hujum qilgan. Voqea mahalliy vaqt bilan soat 11:46 da (Toshkent vaqti bilan 13:46) sodir bo‘lgan. Otishma natijasida uch nafar politsiya xodimi yaralangan. Qurolli hujumni amalga oshirgan ayol va erkak esa halok bo‘lgan.
Bino yaqinida bo‘lgan odamlar o‘q ovozidan vahimaga tusha boshlagan. Ko‘pchilik qochishga uringan, ayrimlar esa yerga yotgan. Voqea joyiga Istanbul bosh prokurori yetib kelgan. Sud binosi politsiya tomonidan o‘rab olingan, barcha kirish va chiqish eshiklari yopilgan.
Eslatib o‘tamiz, 28-yanvar kuni Istanbuldagi katolik cherkovida qurollangan ikki kishi otishma sodir etib, voqea joyidan qochib ketgandi. Hujum natijasida Tursen Jihan ismli Turkiya fuqarosi vafot etgan. Holat yuzasidan Turkiya politsiyasi Rossiya va Tojikiston fuqarolarini hibsga olgan edi.
