Dubayda qiyin ahvolga tushib qolgan O‘zbekiston fuqarosi vatanga qaytarildi
O‘zbekiston Bosh konsulxonasi tomonidan Birlashgan Arab Amirliklarida kasal bo‘lib, qiyin ahvolda qolgan fuqaro Z.A.ning vatanga qaytishiga yordam berildi. Bu haqda “Dunyo” agentligi ma’lum qildi.
Qayd etilishicha, ushbu insonparvarlik ko‘magi BAAda istiqomat qilayotgan vatandoshlar hamda “Ayollar va bolalarga yordam ko‘rsatish markazi” xayriya tashkiloti rahbariyatining faol qo‘llab-quvvatlovi ostida amalga oshirilgan.
Bosh konsullikka yo‘llangan murojaat asosida Z.A.ning O‘zbekistonga qaytishi uchun zarur barcha hujjatlarni rasmiylashtirish ishlari tashkil etilgan. Ular uchun to‘lovlar va mamlakatga qaytish chiptasi uchun to‘lovlar to‘liq homiylar tomonidan qoplangan.
8-fevral kuni fuqaro Uzbekistan Airways kompaniyasining Dubay—Toshkent yo‘nalishidagi havo qatnovi bilan O‘zbekistonga kuzatib qo‘yilgan.
Bundan oldin Rossiyaga ishlash uchun borib, vafot etgan ayolning 9 yoshli qizi O‘zbekistonga qaytarilgani to‘g‘risida xabar berilgandi. Shuningdek, Misrda avtohalokatga uchrab, og‘ir tan jarohati olgan o‘zbekistonlik ayol vatanga qaytarilgan, Rossiyada eri qamalib, chaqalog‘i bilan qiyin ahvolda qolgan ayolga yordam ko‘rsatilgan edi.
