Qo‘qonda sud xodimi 1000 dollar pora bilan qo‘lga tushdi

Fuqarolik ishlari bo‘yicha Qo‘qon tumanlararo sudining arxivariusi A.A. 1000 dollar pora olganida qo‘lga tushdi. Bu haqda Oliy sud matbuot kotibi xabar berdi.

Ma’lum qilinishicha, sud xodimi fuqaro G.J.dan turmush o‘rtog‘i T.J. bilan qonuniy nikohdan ajratib berish evaziga 1 000 dollar miqdordagi pullarni olgan vaqtda huquqni muhofaza qiluvchi organ xodimlari tomonidan o‘tkazilgan tadbirda qo‘lga olingan.

“Oliy sud mamlakatimizning har bir fuqarosini jamiyatda, xususan, sud organlarida korrupsiyani tag-tomiri bilan bartaraf etishda faol hamkorlikka chaqiradi. Agar sud xodimi faoliyatida korrupsiya bilan bog‘liq xatti-harakat (yoki harakatsizlik)ni kuzatsangiz, sezsangiz, bu haqda zudlik bilan Oliy sud Korrupsiyaga qarshi kurashish bo‘yicha ichki nazorat guruhining (71) 239-01-79 raqamli Ishonch telefoniga maʼlum qilishingizni so‘raymiz”, — deyiladi xabarda.

Avvalroq O‘zbekiston Hakamlik sudlari assotsiatsiyasining Navoiy viloyat vakolatxonasi huzuridagi doimiy faoliyat ko‘rsatuvchi hakamlik sudi sudyasi 500 dollar va 6 million 250 ming so‘m olgan vaqtida ushlangani to‘g‘risida xabar berilgandi. Keyinroq Sudyalar oliy kengashi hakamlik sudlari sud tizimiga kirmasligini ma’lum qildi.