Odam savdosida ayblanib, qidiruvda bo‘lgan yana bir o‘zbekistonlik ayol Turkiyada ushlandi
Odam savdosi jinoyatini sodir etganlikda ayblanib, qidiruvda bo‘lgan yana bir o‘zbekistonlik ayol Istanbulda ushlandi. Bu haqda Bosh konsulxona axborot xizmati xabar berdi.
U Turkiya politsiyasi va O‘zbekiston IIV Tezkor-qidiruv departamenti qidiruv boshqarmasi hamkorligida o‘tkazilgan navbatdagi tezkor tadbir davomida qo‘lga olingan.
Ma’lum qilinishicha, jinoyat olamida “Monya” taxallusi bilan tanilgan, 2001-yilda tug‘ilgan ayol M.A. odam savdosi jinoyatini sodir etganlikda ayblanib, 2023-yildan buyon O‘zbekiston IIV tomonidan qidiruvda bo‘lgan.
Uning xatti-harakatlaridan jabr ko‘rgan fuqarolardan O‘zbekistonning Istanbul shahridagi Bosh konsulxonasiga yoki O‘zbekiston Ichki ishlar vazirligiga murojaat qilish so‘raldi.