Тошкент вилояти Пискент туманида куз-қиш мавсумида аҳоли эҳтиёжи учун имтиёзли нархда сотиш учун ажратилган кўмирни талон-торож қилиш ҳолати аниқланди, деб хабар беради Бош прокуратура ҳузуридаги департамент.
![](/static/2023/12121/photo_2023-11-14_12-53-02.jpg)
Қайд этилишича, департаментнинг Пискент туман бўлими томонидан терговга қадар текширув ўтказилган. Текширув давомида “Кўмир таъминот” МЧЖнинг Тошкент вилояти филиали раҳбари С.И., омбори мудири Ф.Х. ва бошқалар 2023—2024 йилги куз-қиш мавсумида аҳоли эҳтиёжи учун имтиёзли нархда сотиш учун ажратилган 794,2 тонна кўмирни Пискент тумани аҳолисига етказиб бермасдан, қалбаки юк хатларини расмийлаштириш орқали талон-торож қилганликлари аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Бундан олдин Андижоннинг Андижон, Булоқбоши, Жалақудуқ туманларида аҳолига ажратилган кўмирни талон-торож қилган омбор мудирлари қўлга олингани тўғрисида хабар берилганди.