Қирғизистон президенти самолётида тўрт нафар бемор Туркияга даволанишга жўнатилди. Бу ҳақда мамлакат ҳукуматининг “Медиаштаб” Telegram канали хабар берди.
Маълум қилинишича, 3 февраль куни Бишкекдаги ИЭСда жабрланган икки киши, шунингдек, Бишкек яқинида Ми-8 ҳарбий вертолёти қулаши оқибатида жароҳатланган икки нафар ҳарбий хизматчи Қирғизистон президенти Садир Жапаров топшириғига кўра даволанишни давом эттириш учун Туркиядаги ихтисослаштирилган клиникалардан бирига жўнатилди.
-jnKd5Xv_.jpg)
Беморларга оила аъзолари ва икки нафар шифокор ҳамроҳлик қилади. Уларнинг барчаси президентнинг ТU-154 самолёти орқали Туркияга юборилди.
“Жабрланганларга ёрдам кўрсатиш бўйича барча чора-тадбирлар Қирғизистон президенти шахсан назоратида бўлиб, беморлар, уларнинг яқинлари ва тиббиёт ходимларини Туркияга етказиш учун молиявий маблағ ажратилди”, — дейилади хабарда.
Бишкекдаги иссиқлик электр станциясида портлаш 2 февралга ўтар кечаси юз берганди. Ҳодиса оқибатида 5 киши жабрланган. Улардан икки нафари амбулатор даволанишга юборилган, яна икки нафари куйиш жароҳати билан реанимацияда оғир аҳволда эди.
17 январь куни Ми-8 вертолёти Бишкек яқинида ўқув парвози вақтида қулаб тушганди. Вертолётда 11 киши бўлган. Улардан бири ҳалок бўлган, қолганлари касалхонага ётқизилган.
Изоҳ (0)