Zelenskiy Patron laqabli sapyor itni “Fidokorona xizmatlari uchun” medali bilan taqdirladi (video)

8-may kuni Ukraina prezidenti Vladimir Zelenskiy Favqulodda vaziyatlar davlat xizmati xodimlariga “Fidokorona xizmatlari uchun” medallarini topshirdi. Taqdirlash marosimi Ukrainaga tashrif buyurgan Kanada bosh vaziri Jastin Tryudoning ishtirokida bo‘lib o‘tdi.

Mukofotlanganlar orasida Patron laqabli it ham bor, u jangovor harakatlar kechayotgan hududlarda minalarni qidirishga yordam bergan. Patron ijtimoiy tarmoqlarda mashhur, Ukraina favqulodda vaziyatlar xizmati xodimlari uni o‘zlarining tumori deb biladi.

“Men nafaqat portlovchi obyektlarni zararsizlantirishga yordam berayotgan, balki bolalarimizga mina xavfi mavjud bo‘lgan hududda zarur xavfsizlik qoidalarini o‘rgatishda ko‘maklashayotgan sapyor Patronni taqdirladim”, — deya Zelenskiydan iqtibos keltiradi “Interfaks-Ukraina”.

Patron Tryudo bilan tanishganidan xursand bo‘ldi, deb yozadi Ukraina favqulodda vaziyatlar davlat xizmati o‘zining Telegram’dagi kanalida.