Toshkentda xitoylik ayolga tegajog‘lik qilgan santexnikka sud hukmi o‘qildi
Toshkent shahar Chilonzor tumanida xitoylik ayolga tegajog‘lik qilgan santexnikka sud hukmi o‘qildi. Bu haqda shahar sudi axborot xizmati “Daryo”ga xabar berdi.
Aytilishicha, 2023-yil 1-noyabr kuni chet el fuqarosi, xitoylik ayol Chilonzor tumani IIO FMBga ariza bilan murojaat qilib, unda yashash uyiga santexnik ishlarini bajarish uchun kelgan fuqaro U.S. shilqimlik qilib, qo‘lidan ushlab, quchoqlab olganini maʼlum qilgan. Unga nisbatan qonuniy chora ko‘rishni so‘ragan.
Sud majlisida so‘ralgan fuqaro yuqorida ko‘rsatib o‘tilgan holatdagi aybiga iqrorligini, bunday holat boshqa takrorlanmasligini, yengillik berishni so‘radi. Uning mazkur huquqbuzarlikni sodir qilgani, uning o‘z aybiga iqrorlik bildirib bergan ko‘rsatuvi, IIO xodimining bildirgisi, maʼmuriy huquqbuzarlik to‘g‘risidagi bayonnoma, tushuntirish xatlari, sud majlisi jarayonida aniqlangan holatlar va ish materiallarida mavjud bo‘lgan dalillar bilan to‘liq tasdig‘ini topdi.
Erkak Maʼmuriy javobgarlik to‘g‘risidagi kodeksning 411-moddasining 1-qismida ko‘rsatilgan huquqbuzarlikni sodir etganlikda aybdor deb topildi va unga nisbatan 5 sutka maʼmuriy qamoq jazosi tayinlandi.
