Saroylar, qasrlar, hashamatli turar joylar: Marvel yulduzlari qanday uylarda yashaydi?

Skarlett Yoxansson, Kris Xemsvort, kichik Robert Dauni va Marvel filmlarida rol o‘ynagan boshqa aktyorlarning hashamatli va betakror dizaynga ega uylari bilan tanishing.

Skarlett Yoxansson

Qora beva ijrochisi Qo‘shma Shtatlarning turli burchaklarida joylashgan bir nechta uylarning egasi hisoblanadi. O‘zining yorqin karyerasi davomida u Kaliforniyadan uchta uy sotib olib, yaxshigina pulga sotishga muvaffaq bo‘ldi.

Biroq Skarlettning ko‘chmas mulki sifatida Los-Anjelesdagi qasri qoldi. Uning narxi 3,8 million dollarni tashkil qiladi. Uyda 4 ta yotoqxona va 6 ta hammom bor. Interyer devorlari oq rangda, ko‘plab mebellar ham shu rangda ishlangan. Balkondan Gollivudning ajoyib manzarasi ko‘rinib turadi.

Mish-mishlarga ko‘ra, uning uylaridan birida 2 million dollarlik aqlbovar qilmaydigan qimmatbaho rakovina ham bor.

Kris Evans

2013-yilda Kapitan Amerika aktyori Los-Anjelesda 3,52 million dollarga hashamatli uy sotib oldi. Bu uy 1940-yilda qurilgan, lekin bir necha marta ta’mirlangan. Unda uchta yotoqxona, to‘rtta hammom va ko‘plab qimmatbaho mebellar bor.

Ammo 2021-yil boshida Evans uyni sotishga qaror qildi. U akasi va iti bilan Bostonga ko‘chib o‘tdi. Aktyor bu yerdan vodiyning ajoyib manzarasi ko‘rinib turadigan katta ayvon va basseynli uy sotib oldi.

Kichik Robert Dauni

“Temir odam” filmlarining yulduzi har doim hashamatda yashashga intilgan. Aktyor Kaliforniyada bir nechta uylarni, shuningdek, Nyu-Yorkdagi saroyni ham sotib olgan.

2009-yilda u Malibudagi ko‘chmas mulk uchun 13,4 million dollar sarfladi. Bino g‘ayrioddiy ko‘rnishda bo‘lib, toshbaqa qobig‘iga o‘xshaydi. Xonaga kirishlar g‘or teshiklari bilan bog‘langani uchun ko‘pchilik bu uyni hobbit g‘ori deb bilishadi.

Mark Ruffalo

Xalk roli ijrochisi Bruklindagi shinam uch qavatli hashamatli uyga ega edi. Uyda to‘rtta yotoqxona, uchta hammom bor. Saroyning narxi 4,5 million dollarni tashkil qiladi. U shaharning tarixiy tumanida joylashgan va alohida ahamiyatga ega.

Interyer dizayni jigarrang toshlar bilan italyancha uslubda yaratilgan. Xonalarda aktyorning nafis dididan dark beruvchi ko‘plab yorqin detallar va mebellar mavjud.

2009-yilda Mark uyni xonanda Zoui Deshanelga sotdi. Keyinchalik u Nyu-Yorkdan hashamatli arxitekturasi bilan mashhur bo‘lgan uy sotib oldi.

Kris Xemsvort

“Tor” yulduzi Avstraliyaning Bayron Bay shahrida o‘ziga qasr qurirdi. Bu uy Krisga 20 million dollarga tushdi. Dizaynerlar Xemsvortga yengil fasad va panoramali derazalarga ega zamonaviy uslubdagi uyni qurishda yordam berishdi. Unda sport zali va kinoteatr, kurort, o‘yin xonasi va oltita yotoqxona mavjud.