“Mehribonginam” hind filmi yulduzi Jaya Pradaning taqdiri qanday kechdi? (foto)
Jaya Prada 1980—1990-yillarda Bollivudning mashhur aktrisalaridan biri bo‘lgan. U kamtarin, mehribon rafiqa va ona bo‘lishiga qadar mashaqqatli yo‘lni bosib o‘tdi, Bollivudning ko‘plab filmlarida, masalan, “Mehribonginam”, “Yaxshiroq osmon”, “Dangasa”, “Shafqatsiz taqdir”, “Sovg‘a“ va boshqa kinokartinalarda suratga tushdi. Aktrisa Hindistonning siyosiy arboblaridan biri hisoblanadi.
Aktrisaning haqiqiy ismi — Lalita Rani. U 1962-yilning 3-aprel sanasida Andhra-Pradesh janubidagi kichik Rajahmundri shahrida oddiy oilada tug‘ilgan. “Ha, otam filmlar bilan bog‘liq va ba’zi loyihalarni moliyalashtirgan, biroq mening tarbiyam juda bosiq edi. Bolaligimdan shifokor bo‘lishni orzu qilardim, biroq onam ta’lim bilan bir qatorda raqs va musiqaga e’tibor qaratdi, shuning uchun yetti yoshimda men raqs to‘garagiga yozildim”, —deydi Lalita.
“Men ham yoshligimdan NTR’ga qoyil qoldim va bir kuni jasoratimni to‘plab, amakimdan kumirim bilan uchrashishni so‘radim. Amakim Chinnayda filmlarni moliyalashtirgan va NTR’ni shaxsan bilar edi. Bir kun kelib shunday mashhur yulduzning qahramoniga aylanaman deb hech o‘ylamagandim” — deya qo‘shimcha qiladi aktrisa.
Lalita kino olamga tasodifan kirib kelgan. U 9-sinfda o‘qiyotgan paytida maktabning yillik ziyofatida qatnashayotgan payt kinorejissor Tilakaning e’tiborini tortgan. U Lalitani 1974-yilda namoyish etilgan “Yer uchun” filmida raqs bilan bog‘liq sahnani ijro etishga taklif qildi. Aktrisaning o‘zi bu taklifni qabul qilishga jur’at eta olmadi, ammo uning ota-onasi xursand bo‘ldi va roziligini bildirdi.
Jaya Prada ishtirokidagi birinchi film 1974-yilda namoyish etilgan. Aktrisa ko‘plab intervyularida birinchi marta kamera qarshisida turganida 14 yoshda bo‘lganini aytgan. Ma’lum bo‘lishicha, ko‘plab manbalarda aktrisaning 1962-yilda emas, 1960-yilda tug‘ilgani aytilgan. Ko‘pincha hind kinosi yulduzlarining haqiqiy yoshi yashiriladi, shuning uchun bu ajablanarli holat emas.
Lalitaning go‘zalligiga mahliyo bo‘lgan aktyor Prabxakar Reddi unga “G‘alaba baxsh etuvchi” degan ma’noni anglatuvchi Jayaprad taxallusini taklif qiladi. Shunday qilib, uning kinodagi yo‘li muvaffaqiyat bilan boshlanadi. Aktrisaga rejissorlar Bapu, Vishvanat va Balachander e’tibor qaratadi.
Aktrisa 14 yoshida taniqli hind aktyorlari Rajnikanth, Chandra Mohan, Kamol Hasan bilan birga filmlarda o‘ynagan. Biroq aktrisa mashhurlikka erishishi uchun katta mablag‘ to‘ladi.
“Aktyorlik mening yoshligimni olib qo‘ydi, sinfdoshlar va do‘stlar bilan muloqotni chekladi. Yaqinda maktabimda mening sharafimga dastur uyushtirildi. Bolalarning chiqishlaridan keyin sahnaga chiqqan o‘qituvchim menga qanday murojaat qilishni bilmasligini aytdi: Lalita, Jaya Prada yoki parlament a'zosi, xullas nima deyishini bilmas edi. Uning ko‘zlaridan yosh oqdi va men ham yig‘ladim”, deydi aktrisa.
Janubda muvafaqqiyat qozonganidan so‘ng, Jaya 1979-yilda Rishi Kapur bilan “Qo‘shiqlar ritmlari” filmida roli bilan Bollivudda muvafaqqiyatga erishdi. Bu uch yil oldin chiqarilgan va ikkita Milliy kino mukofotiga sazovor bo‘lgan telugu tilidagi filmning remeyki edi.
Jaya Prada o‘zining birinchi hind filmida rol o‘ynaganida, ko‘plab insonlar aktrisaning Bollivudda o‘z o‘rnini topa olmasligini, u yerda hech narsa qila olmasligini, chunki hind tilida birorta so‘z bilmasligini aytgan. Biroq Jaya shunchalik qat’iyatli ediki, bir necha yil ichida u hind tilini o‘rgandi va 1982-yilda mustaqil ravishda Rakesh Roshan bilan “Dangasa” filmidagi rolini ijro etdi. Bundan tashqari, u keyinchalik bengal tilini o‘rgandi va bu tilda bir nechta loyihalarda rol o‘ynadi.
Aktrisa ishtirokidagi “Shafqatsiz taqdir” filmidagi ona va qiz roli Jayaning karyerasidagi eng yaxshi rollaridan biri hisoblanadi. Jaya kinoda mashhurlikka erishganidan keyin oilali prodyuser Shrikant Nahatni yaxshi ko‘rib qoldi va jamiyatda qoralanishga duch keldi. Prodyuser rafiqasining qarshiliklariga va uch farzandining ko‘z yoshlariga qaramay, 1989-yilning 22-fevral sanasida aktrisa bilan turmush qurdi.
Oradan ko‘p yillar o‘tgach, Jaya Prada: “Erkakning hayotida “boshqa ayol” bo‘lish juda jarohatli holat. Bu qanchalik og‘riqli va tahqirli ekanini tasavvur ham qila olmadim. Men Shrikant uchun hamma narsadan voz kechdim, biroq boshqalardan olganim faqat haqorat va masxara qilish edi. Menga “sevgilisi” tamg‘asini qo‘yib, orqamdan kulishdi”, — deb aytgan.
Jaya Prada 1994-yilda “Mamlakat partiyasi” deb nomlangan Telugu partiyasiga qo‘shildi va rasman siyosatchi bo‘ldi. Hayot uni tez-tez sinovdan o‘tkazdi. Aktrisaning nikohi buzildi, partiyada bo‘linish yuz berdi va u saylovlarda yutqazdi. “Men hech narsasiz qoldim — aktyorlik va siyosatdan ayrildim. Faqat bitta: o‘z jonimga qasd qilish istagi bor edi. Biroq bir kuni ertalab o‘rnimdan turib o‘zimga kurashishga va’da berdim.
Hozirgi kunda Jaya Prada mamlakatning siyosiy hayotida faol, u ba’zida turli realiti-shoularda mehmon sifatida ishtirok etadi va 2022-yilda “Ikkinchi oila Simar 2” hind serialida epizod rolni ijro etdi.
