Olimlar Qiyomat soati millarini 10 soniya oldinga surib qo‘ydi (video)
Chikago universiteti tomonidan chop etiladigan “Atomshunos olimlar byulleteni” jurnali yadroviy xavfi darajasini ko‘rsatadigan qiyomat soatini 10 soniya oldinga surib qo‘ydi.
Hozirda soat yarim tungacha (global falokatga eng yaqin vaqt) 90 soniya borligini ko‘rsatmoqda. Olimlar Ukrainadagi vaziyatni hisobga olib, ramziy ma’noni anglatuvchi Qiyomat soatini oldinga surib qo‘ygan. Ular mojaroning nazoratdan chiqib ketishi ehtimoli yuqori ekanini bildirmoqda.
Ramziy soat millarining holatini aniqlashda olimlar siyosiy keskinlik, qurollar, texnologiya, iqlim o‘zgarishi va epidemiyalar bilan bog‘liq xavflarni hisobga oladi. 2022-yil yanvar oyida soat yadroviy tungacha 100 soniya borligini ko‘rsatgan. Soat ko‘rsatkichlari har yili o‘zgartiriladi, unda 15 nafar Nobel mukofoti laureati ishtirok etadi. 2018-yil boshidan beri bu vaqt 23:58:00 ni ko‘rsatayotgan edi.
