Yadro tahdidi: Kreml Qiyomat soati o‘zgarganiga munosabat bildirdi
Rossiya prezidenti matbuot kotibi Dmitriy Peskov Qiyomat soati millari 10 soniya oldinga surib qo‘yilganiga munosabat bildirdi. Bu haqda “Kommersant” xabar berdi.
Peskov hozir dunyodagi vaziyat nihoyatda xavotirli va tarangligini aytib, NATO va AQSHni xalqaro vaziyatni yomonlashtirganlikda aybladi.
“Haqiqatan ham vaziyat umumiy holatda ham tashvishli, u nihoyatda tarang. Vaziyatning rivojlanish istiqbollari NATO va AQSH rahbariyati tomonidan tanlangan yo‘nalishni hisobga olgan holda, hali hech qanday pasayishni va’da qilmaydi”, — deydi Peskov.
24-yanvar kuni “Atomshunos olimlar byulleteni” jurnali vakillari global falokatni anglatuvchi Qiyomat soatining millarini oldinga surib qo‘ydi. U “yadro apokalipsisi nuqtasi”ga 90 soniya qolganini ko‘rsatmoqda. Bu 1947-yilda yaratilgan loyiha tarixidagi eng yuqori xavf darajasidir. Olimlar vaqt o‘zgarishining asosiy sababi “Ukrainada urush xavfi kuchayishi” deb atagan.
