O‘zbekiston va Qirg‘iziston o‘rtasidagi savdo aylanmasini 2 mlrd dollarga yetkazish rejalashtirilmoqda
O‘zbekiston va Qirg‘iziston o‘rtasidagi savdo aylanmasini 2 mlliard dollarga yetkazish rejalashtirilmoqda. Bu haqda Qirg‘iziston Savdo-sanoat palatasi prezidenti Temir Sariyev 26-yanvar kuni Bishkekda bo‘lib o‘tgan Qirgʻiziston—Oʻzbekiston biznes-forumida aytib o‘tdi.
U O‘zbekiston tomoni rahbariyati va ishbilarmon doiralar vakillaridan hamkorlik bo‘yicha yirik loyihalarni amalga oshirish istagi borligini eshitishdan mamnun bo‘lganini bildirib o‘tdi. Oʻzbekistonda import oʻrnini bosishga, xorijdan emas, Qirgʻizistondan mahsulotlarni olib kelishga ham qiziqish bildirilayotganini qayd etdi.
“Bugun bu masala bilan bogʻliq raqamlar ham eʼlon qilindi. Qirgʻiziston chet davlatlardan qariyb 800 million dollarlik mahsulot xarid qiladi. Xuddi shunday mahsulotlar Oʻzbekistonda ham ishlab chiqariladi. Bu masala hal etilsa, Oʻzbekiston va Qirgʻiziston oʻrtasidagi hamkorlik yangi bosqichga koʻtariladi. Shu bois bugungi biznes-forumda aytilganidek, bizning strategik vazifamiz — kooperatsiya va yaqin hamkorlikning yangi darajasiga koʻtarilishdir”, — deydi Temir Sariyev.
Uning ta’kidlashicha, bu har ikki mamlakatlarda farovonlik oshishiga, o‘zaro munosabatlar yana yaxshilanishiga, birodar xalqlar hamjihatlikda yashashiga olib keladi.
Temir Sariyev Xitoy—Qirg‘iziston—O‘zbekiston temiryo‘li qurilishi ahamiyatiga ham to‘xtalib o‘tdi.
“Biznes ushbu loyiha amalga oshirilishini qo‘llab-quvvatlaydi. Bu XXI asrning eng yirik loyihalaridan biri bo‘ladi deb o‘ylayman. Ushbu loyiha O‘zbekistonga ham kerak. Asosiysi, Qirg‘iziston ham, O‘zbekiston ham tranzit mamlakatlarga aylana oladi. Ular dengiz portlariga ham chiqish imkoniyatiga ega bo‘ladi, bu esa G‘arb bilan Sharqni, Janub bilan Shimolni yanada bog‘laydi”, — deydi u.
Uning aytishicha, ushbu temiryo‘l qurilishi bo‘yicha birinchi texnik-iqtisodiy asos joriy yilning o‘rtalarida tayyor bo‘lishi kutilmoqda, qurilish ishlariga esa 2023-yil oxiri yoki 2024-yil boshlarida start berilishi kutilmoqda.
“Temiryo‘l qurilsa, bizning iqtisodiy, savdo-sotiq, logistika va transport imkoniyatlarimiz bir necha barobar oshadi, shuningdek, mamlakatlarimizga tranzit tashish orqali daromad olish imkoniyatini beradi”, — deydi Qirg‘iziston Savdo-sanoat palatasi prezidenti.
