Maktabgacha va maktab ta’limi vaziriga o‘rinbosarlar tayinlandi
Prezident qarori bilan Maktabgacha va maktab ta’limi vazirigida yangi tayinlovlar amalga oshirildi.
Xalq ta’limi vazirining birinchi o‘rinbosari lavozimida ishlagan Usmon Sharifxo‘jayev maktabgacha va maktab ta’limi vaziri birinchi o‘rinbosari bo‘ldi.
Temurjon Komilov, Dilshod Kenjayev, Uzoqboy Begimqulov maktabgacha va maktab ta’limi vaziri o‘rinbosarlari etib tayinlandi.
Tayinlovga qadar Temurjon Komilov xalq ta’limi vaziri o‘rinbosari lavozimida, Dilshod Kenjayev prezidentning yoshlar, fan, ta’lim, sog‘liqni saqlash, madaniyat va sport masalalari bo‘yicha maslahatchisi o‘rinbosari lavozimida, Uzoqboy Begimqulov oliy va o‘rta maxsus ta’lim vazirining fan va innovatsiyalar bo‘yicha o‘rinbosari lavozimida ishlab kelgan.
Alisher Ubbiyev ushbu vazirlik huzuridagi Ixtisoslashtirilgan ta’lim muassasalari agentligi direktori lavozimiga tayinlandi. Tayinlovga qadar Prezident ta’lim muassasalari agentligi direktori o‘rinbosari lavozimida ishlab kelayotgandi.
Boshqa ishga o‘tishi munosabati bilan:
- Baxodirjon Onorboyev maktabgacha ta’lim vazirining birinchi o‘rinbosari lavozimidan, Nodir Muslitdinov maktabgacha ta’lim vaziri o‘rinbosari lavozimidan;
- Ibrohim Jo‘rayev va Voxobjon Rajapov xalq ta’limi vaziri o‘rinbosari lavozimidan ozod etildi.
Eslatib o‘tamiz, Maktabgacha va maktab ta’limi vazirligiga Hilola Umarova rahbarlik qilib kelmoqda.
