O‘zbekistonlik yosh sportchilar Turkiyadagi zilzila o‘chog‘idan olib chiqildi
Turkiyaning Kaxramanmarash shahrida xalqaro musobaqada qatnashayotgan o‘zbekistonlik yosh kurashchilar zilzila o‘chog‘idan muvaffaqiyatli olib chiqildi, deya xabar qilmoqda MOQ matbuot xizmati.
Yoshlar o‘rtasidagi Osiyo chempionatida qatnashayotgan o‘zbekistonlik kurashchilar zilzila o‘chog‘i hisoblangan Kaxramanmarash shahridan Turkiya poytaxti Anqaraga olib borilgan. Ayni vaqtda delegatsiyaning barcha a’zolari sog‘-salomatligi ma’lum qilindi.
O‘zbekiston yoshlar terma jamoasi a’zolari Istanbul orqali Toshkentga olib kelinadi. Oʻzbekiston sport kurashlari assotsiatsiyasi bosh kotibi Shuhrat Mamadaliyev sportchilarni olib kelish uchun Istanbulga jo‘nab ketgan.
Eslatib o‘tamiz, 6-fevral tongida Turkiyaning Gaziantep shahri yaqinida 7,5 magnitudali kuchli zilzila sodir bo‘ldi. Yer silkinishlari yana bir qancha viloyatlarda, shuningdek, Suriya va Livanda ham sezilgan. Shu kuni Turkiya va yana 6 davlatda qator zilzilalar qayd etildi.
