Kreml Putin 2024-yilgi prezidentlik saylovlarida ishtirok etishi haqidagi savolga javob berdi
Vladimir Putin Rossiyada 2024-yilda bo‘lib o‘tadigan prezidentlik saylovlarida qatnashish-qatnashmasligi haqida hozircha gapirmagan. Bu haqda Kreml matbuot kotibi Dmitriy Peskov “TASS” agentligiga bergan intervyusida ma’lum qildi.
“Bu borada bayonot eshitdingizmi? Men ham eshitmadim”, — dedi Rossiya prezidenti matbuot kotibi jurnalistning tegishli savoliga javoban. Peskov prezident bu boradagi qarorini qachon e’lon qilishi haqida bir narsa deyolmasligini aytdi.
21-fevral kuni Putin Federal Majlisga murojaat yo‘llar ekan, 2024-yilda bo‘lib o‘tadigan prezidentlik saylovlari qatʼiy qonunlarga muvofiq, shuningdek, barcha demokratik va konstitutsiyaviy tartiblarga rioya qilingan holda o‘tkazilishini aytdi. Bu 2023-yil sentabrida mahalliy va mintaqaviy hokimiyat organlari uchun bo‘ladigan saylovlarga ham tegishli, dedi Rossiya rahbari.
Qonun bo‘yicha Putin 2024-yilda yangi prezidentlik muddati uchun nomzodini qo‘yish huquqiga ega. Yanvar oyi boshida “Kommersant” manbalari Kremlning ichki siyosiy bloki 2024-yilgi prezidentlik saylovlariga ular belgilangan muddatda va amaldagi prezident ishtirokida o‘tkazilishidan kelib chiqib tayyorgarlik ko‘rishni boshlagani haqida xabar bergandi. Meduza 2022-yil oktabr oyida Kreml prezidentlik kampaniyasiga tayyorgarlikni boshlaganini yozgan.
Prezident saylovidan avvalgi so‘nggi hududiy saylovlar 2023-yil sentabriga belgilangan, “Kommersant” manbasi aytishicha, u ancha ko‘p sonli hududlarni o‘z ichiga oladi. Demak, hududiy saylovlarda ham texnologik, ham mazmuniy g‘oyalarni sinab ko‘rib, so‘ng ularni 2024-yilda ham qo‘llash mumkin bo‘ladi. Bu yil kamida 20 ta hududda gubernatorlarning to‘g‘ridan to‘g‘ri saylovlari, 16 tasida esa qonunchilik majlislariga saylovlar bo‘lib o‘tishi kerak.
