Abdulaziz Komilov Islom hamkorlik tashkiloti bosh kotibi bilan uchrashdi
O‘zbekiston prezidentining tashqi siyosat masalalari bo‘yicha maxsus vakili Abdulaziz Komilov 12-mart kuni Islom hamkorlik tashkilotining (IHT) Jidda shahridagi qarorgohida IHT bosh kotibi Husayn Ibrohim Toha bilan uchrashdi. Bu haqda “Dunyo” agentligi xabar berdi.
Suhbat davomida Husayn Ibrohim Toha so‘nggi 5 yilda Yangi O‘zbekiston musulmon davlatlari bilan aloqalarni sezilarli darajada oshirganini ta’kidlagan. Toshkentning yangi siyosati siyosiy, savdo-iqtisodiy, sarmoyaviy hamkorlikni rivojlantirish va kengaytirishga, hamda Markaziy Osiyo barqarorligi va xavfsizligini mustahkamlash masalalariga ijobiy taʼsir ko‘rsatmoqda.
IHT bosh kotibi Husayn Ibrohim Toha, shuningdek, O‘zbekiston afg‘on masalasida muhim rol o‘ynashini va Afg‘onistonga ko‘p tomonlama gumanitar hamda iqtisodiy yordam ko‘rsatish bo‘yicha turli loyihalarni ilgari surish tashabbusi bilan chiqayotganini alohida qayd etgan. IHTning Afg‘oniston bo‘yicha maxsus vakili O‘zbekiston bilan bu davlat bo‘yicha saʼy-harakatlarni muvofiqlashtirish va qo‘shma choralar ko‘rish tarafdori.
Bosh kotibga respublikada konstitutsiyaviy islohotlar bo‘yicha referendum o‘tkazilishi haqida maʼlumot berilgan. Husayn Ibrohim Toha ushbu muhim siyosiy tadbirda IHT kuzatuvchilari ishtirok etishini tasdiqladi.
Uning aytishicha, tarixiy Samarqand shahrini ko‘rish uchun Ramazon oyidan so‘ng O‘zbekistonga tashrif buyurishni rejalashtirmoqda.
