“O‘z-Hanwoo” o‘tkazgan qariyb 1 milliard so‘mlik tenderda tadbirkor o‘zini-o‘zi yutdi

Andijon viloyatida faoliyat olib boruvchi “O‘z-Hanwoo” qo‘shma korxonasi 8—15-mart kunlari Tovar-xomashyo birjasida tender o‘tkazdi. “Daryo” muxbiri xarid ma’lumotlari bilan tanishish jarayonida shubhali holatga duch keldi.

Kontekst

Avtotransport vositalari uchun butlovchi qismlar va aksessuarlar ishlab chiqarish bilan shug‘ullanuvchi “O‘z-Hanwoo” qo‘shma korxonasining ovoz o‘tkazmaydigan materiallarga marmar yostiq yetkazib berish bo‘yicha o‘tkazgan tenderi yakunlandi. Xarid lotining boshlang‘ich narxi 1 milliard 53 million so‘m etib belgilangandi.

Lot ma’lumotnomasiga ko‘ra, buyurtma qilinayotgan maxsus yostiqlar uch xil o‘lchamda bo‘ladi. Ularning jami soni 520 mingta bo‘lib, o‘rtacha narxi 1300 so‘mdan 2650 so‘mgacha baholangan.

Protokolda yozilishicha, tenderni yutish uchun ikkita MCHJ raqobatlashgan. Ular:

• “Yuksak Biznes Taraqqiyoti”;
• Asakalik Solijon Avlodlari”.

Komissiya a’zolari ularni 10 ta kriteriya bo‘yicha baholagan. So‘ng taklif etilayotgan narxlar bilan tanishib, yakuniy ballarni e’lon qilgan — 100 ga 40. “Asakalik Solijon Avlodlari” MCHJ juda katta farq bilan tender g‘olibi deb topilgan. Shartnoma summasi esa 933 million 400 ming so‘m etib belgilangan. Qizig‘i shundaki, “Yuksak Biznes Taraqqiyoti” MCHJga 9 ta kriteriya bo‘yicha 1 balldan berilgan, xolos.

Bekgraund

Tender ishtirokchilarining rahbariyati bilan qiziqdik. Ochiq ma’lumotlarga ko‘ra, g‘olib korxona (“A.S.A.”)ning rahbari Soliyev Soibjon Soliyevich hisoblanadi. Ustav fonddagi ta’sischilar esa uchta bo‘lib, Qobulov G‘ofurjon Shahobiddinovich ular ichida eng ko‘p ulushga egalik qiladi.

Shubhalisi, zaxira g‘olib “Y.B.T.” MCHJning yagona ta’sischisi va rahbari ham o‘sha odam — Qobulov G‘ofurjon Shahobiddinovich, “A.S.A“ korxonasi aksiyadorlaridan biri.

Bundan kelib chiqyaptiki, qariyb 1 milliard so‘mlik tenderda bir odamga tegishli ikkita korxona “raqobatlashyapti”, hakamlar ulardan biriga juda ham shubhali ballar qo‘yib tashlayapti va yakunda tenderning intrigasiz o‘tishiga sabab bo‘lyapti.

Mas’ullardan ushbu shubhali tenderlar natijalariga e’tibor qaratishni so‘raymiz.

Muxbir:

Abduqahhor Qosimov