Toshkentda sportchi erkak o‘z farzandini ayovsiz kaltaklaganining sababi ma’lum bo‘ldi 

Toshkent shahar Yangihayot tumanida sportchi erkak o‘z xotini va bolasini ayovsiz kaltaklagani haqida xabar berilgan edi. Mazkur holat bo‘yicha yangi tafsilotlar ochiqlandi. 

Ushbu oila yashagan mahalla raisining so‘zlariga ko‘ra, ular mazkur mahallaga 3 yil avval ko‘chib kelgan. Uch yil davomida ko‘p marotaba oilada janjal bo‘lgan. 5-6 marotaba himoya orderi ham berilgan. Biroq ayol ko‘p marotaba arizasini qaytarib olgan. Shuningdek, er-xotin bir-birini yaxshi ko‘rishi va janjallar asosan rashk sabab kelib chiqishi aytilgan. Mahalla raisining maʼlum qilishicha, erkak o‘g‘lini “trenirovka” vaqtida yaxshi mashq qilmagani sababli urgan. 

Mazkur holat yuzasidan Yangihayot tumani IIO FMB Tergov bo‘limi tomonidan O‘zbekiston Respublikasi Jinoyat kodeksining 109-moddasi (qasddan badanga yengil shikast yetkazish) va 110-moddasi (qiynash) bilan jinoyat ishi qo‘zg‘atilgan. Gumonlanuvchi protsessual tartibda ushlangan. Holat yuzasidan tergov davom etmoqda.