Braziliya va Xitoy o‘rtasida savdoda dollardan voz kechilib, yuanga o‘tildi

Braziliya va Xitoy o‘rtasida savdo operatsiyalarida yuandan foydalanish bo‘yicha kelishuv imzolandi. Bu haqda Pekinda bo‘lib o‘tgan Braziliya—Xitoy biznes-forumida Xitoy savdo vaziri o‘rinbosari Guo Tingting ma’lum qildi.

Endi davlatlar valyutalarini AQSH dollariga konvertatsiya qilmasdan turib, transchegaraviy operatsiyalarni bevosita amalga oshirishlari mumkin bo‘ladi. 

“Braziliya bilan yuanda to‘lov bo‘yicha kelishuv imzolandi, bu savdomizni ancha osonlashtiradi. Biz oziq-ovqat va mineral xomashyo sohasidagi hamkorlikni kengaytirmoqchimiz, Xitoydan Braziliyaga va Braziliyadan Xitoyga yuqori qo‘shimcha qiymatga ega mahsulotlarni eksport qilish imkoniyatlarini qidiramiz”, — deydi vazir.

Xitoy so‘nggi 13 yil ichida Braziliyaning eng yirik savdo sherigi bo‘lgan. 2022-yilda ikki davlat o‘rtasidagi tovar ayirboshlash rekord darajada 150 milliard AQSH dollariga yetdi.

Xitoy yuanidan foydalangan holda kliring mexanizmlari bo‘yicha memorandum Xitoy Xalq banki va Braziliya Markaziy banki o‘rtasida 8-fevral kuni imzolangan edi.