Chiroqchida yovvoyi ayiq paydo bo‘ldi. U Samarqanddagi qo‘riqxonadan qochgan bo‘lishi mumkin

Qashqadaryo viloyatining Chiroqchi tumanidagi qishloqlarning birida yovvoyi ayiq paydo bo‘ldi. Telegram messenjeridagi kanallarda tarqalgan videoda ayiqning odamlar yashovchi xonadonlargacha kirib borganini ko‘rish mumkin.

“Daryo” manbasining xabar qilishicha, ayiq tumanga Samarqand viloyatidagi qo‘riqxonalardan kirib kelgani taxmin qilinmoqda.

“Ayni paytda tuman hokimi boshchiligidagi to‘rtta sektor rahbarlari, tuman Ekologiya bo‘limi xodimlari ayiq borligi aytilgan hudud —''Oqoltin'' mahallasiga yetib borgan”, — deydi manba.

Manbaning aytishicha, qishloqqa oralagan ayiq haqida tuman Ekologiya bo‘limiga kecha, 4-aprel kuni xabar berilgan.

“Odamlar ayiqqa zarar yetkazmasligi uchun sektor rahbarlari voqea joyiga kelib, ayiqni eson-omon tutishib, Samarqanddagi qo‘riqxonaga qaytishni reja qilishgan”, — deydi manba.

Qashqadaryoda odamlar yashovchi qishloqqa ayiq oralashi avval ham bo‘lgan. O‘shanda ayiq homilador ayolning homilasi tushishiga sabab bo‘lgani bois, odamlar uni o‘ldirgandi.