Chiroqchidagi qishloqda paydo bo‘lgan yovvoyi ayiq otib o‘ldirilgani aytilmoqda (video)

Qashqadaryo viloyatining Chiroqchi tumanidagi qishloqda paydo bo‘lgan yovvoyi ayiq otib o‘ldirilgani xabar berildi. Tarmoqlarda ayiqning otilgani aks etgan videotasvirlar ham paydo bo‘ldi.

Tabiat resurslari vazirligi axborot xizmati vakili bu xabarni tasdiqladi.

Masʼul “Daryo” jurnalistining “ayiq vazirlik vakillari tomonidan otilganmi yoki mahalliy aholi tomonidanmi?” degan savoliga “bunga aniqlik kiritilmoqda”, deya javob qaytargan.

Avvalroq ayiq odamlar yashovchi qishloqqa borgani va hatto ushbu hududdagi umumtaʼlim maktabi binosiga kirishga uringani xabar berilgandi. Keyinchalik hokimlik bunga munosabat bildirib, ayiq qishloqdagi jarliklardan biriga kirib olganini, ayiqning odamlarga zarar yetkazmasligi, shuningdek, odamlar hayotiga xavf solmasligi masʼullar nazoratida ekani aytilgandi.