Surxondaryoda zapravkadagi Matiz'ning gaz balloni portladi
Surxondaryo viloyati Angor tumanida joylashgan zapravkada Matizning gaz balloni portladi. Favqulodda vaziyatlar vazirligi holat yuzasidan maʼlumot berdi.
Unga ko‘ra, 7-aprel kuni soat 14:12 da Surxondaryo viloyati Angor tumani “Gilambob” MFYda joylashgan avtomobillarga siqilgan gaz quyish shoxobchasida Matiz rusumli avtomobilga gaz quyish vaqtida gaz balloni yorilishi sodir bo‘lgan.
Yorilish natijasida vafot etgan va tan jarohati olgan fuqarolar yo‘q. Voqea joyiga tuman Favqulodda vaziyatlar boshqarmasi, IIB, prokuratura va Sog‘liqni saqlash boshqarmasi xodimlari yetib kelgan.
Avvalroq Qoraqalpog‘istonning To‘rtko‘l tumanidagi zapravkada 17-fevral kuni Nexia-2 gaz balloni portlagani haqida xabar berilgan. Shu kabi Andijonning Asaka tumanidagi gaz zapravkada Damas’ga o‘rnatilgan gaz balloni portlagani aytilgan edi.
