O‘zbekistonda maktab direktorlari tanlov asosida tayinlanishi mumkin

O‘zbekistonda maktab direktorlarini lavozimga tayinlash tizimi o‘zgarishi mumkin.  Bu haqda Maktabgacha va maktab ta’limi vazirligi matbuot xizmati xabar qildi.

“Vazirga murojaat” portaliga kelib tushayotgan mazmunan bir xil savollarga videobayonot tarzida berilgan javobga ko‘ra, Maktabgacha va maktab ta’limi vazirligi tomonidan maktab direktorlarini lavozimga tayinlash va umumta’lim muassasalarini zamonaviy bilimli rahbar kadrlar bilan ta’minlash maqsadida qator amaliy ishlar olib borilmoqda.

“Xususan joriy yil davomida maktabgacha va umumiy o‘rta ta’lim tashkilotlari direktorlarini lavozimga tayinlash va lavozimidan ozod etish jarayonini Qoraqalpog‘iston Respublikasi maktabgacha va maktab ta’limi vazirligi, viloyatlar va Toshkent shahar maktabgacha va maktab ta’limi boshqarmalari tomonidan tanlov asosida tashkil etish bo‘yicha tegishli huquqiy hujjat loyihasi tayyorlanmoqda”, — deyiladi bayonotda.

Ayni paytda maktab direktorlarini lavozimga tayinlash va lavozimdan ozod qilish hokimlar boshchiligidagi mahalliy xalq deputatlari kengashi bilan kelishilgan holda amalga oshirilmoqda.