Turkiyada o‘zbekistonlik fuqaro parda tikadigan mashina orasida qisilib qolishi oqibatida vafot etgani aytildi
Turkiya nashrlari tomonidan o‘zbekistonlik fuqaro parda tikadigan mashina mexanizmi orasida qisilib qolish oqibatida vafot etgani haqida xabar tarqaldi. Tashqi mehnat migratsiyasi agentligi mazkur xabar bo‘yicha ma’lumot berdi.
Unga ko‘ra, Dyuzje shahrida “Beyko‘y” tashkillashtirilgan sanoat zonasidagi fabrikada mehnat faoliyatini amalga oshirayotgan vaqtda parda tikadigan mashina mexanizmi orasida qisilib qolish oqibatida O‘zbekiston fuqarosining vafot etgani haqida xabar e’lon qilingan.
Tashqi mehnat migratsiyasi agentligining Turkiyadagi vakolatxonasi tomonidan o‘rganishlar natijasida ma’lum bo‘lishicha, e’lon qilingan xabar o‘z tasdig‘ini topmadi. Dyuzje viloyati xorijiy fuqarolar mayiti saqlanadigan “morg” bo‘limi taqdim etgan ma’lumotlarga ko‘ra, vafot etgani aytilgan shaxs Afg‘oniston fuqarosi hisoblanadi.
