Toshkent viloyatidagi metan zapravkada Nexia’ning gaz balloni portlab ketdi
Toshkent viloyati Parkent tumanidagi metan zapravkada Nexia avtomobilining gaz balloni portlab ketdi, deb xabar beradi FVV matbuot xizmati.
Qayd etilishicha, 9-iyun kuni soat 09:55 da Parkent tumani “Qayilma” MFY, A.Navoiy shox ko‘chasida joylashgan avtomobillarga gaz quyish shoxobchalarining birida Nexia-1 rusumli avtomashinaga gaz quyish vaqtida unga o‘rnatilgan gaz ballonda yorilish hodisasi ro‘y bergan.
Oqibatda Nexia-1 avtomobili va uning yaqinida bo‘lgan ikkita Damas rusumli avtomashinalarga turli darajada zarar yetgan. Zudlik bilan voqea joyiga FVV qutqaruvchilari va tegishli tashkilot vakillari yetib borgan. Vaziyat oqibatlari bartaraf etilmoqda. Hodisa oqibatida tan jarohati olgan va halok bo‘lganlar yo‘q.
Gaz ballonlarining portlashiga bog‘liq holatlar
May boshlarida Qashqadaryo viloyati Muborak tumanidagi gaz quyish shoxobchasida Nexia-2 mashinasiga o‘rnatilgan gaz ballonida portlash sodir bo‘lgandi. Fevral oxirlarida esa Samarqanddagi metan zapravkada Nexia-3 gaz balloni portlashi oqibatida bir nafar ishchi halok bo‘lgan. Shuningdek, Qoraqalpog‘istondagi zapravkada Nexia-2’ning, Andijondagi gaz zapravkada esa Damas’ning gaz balloni portlagani to‘g‘risida xabar berilgandi.
