Ukraina Germaniyadan qo‘shimcha Leopard 2 tanklarini so‘ramoqda

Ukrainaga ko‘proq G‘arb jangovar tanklari, piyoda askarlarning jangovar mashinalari va boshqa zirhli texnikalari kerak, dedi Ukraina Tashqi ishlar vazirligi rahbari o‘rinbosari Andrey Melnik.

Uning fikricha, Berlin Kiyevga yetkazib bergan 18 ta tankdan ko‘ra ko‘proq tank jo‘natishi mumkin. Germaniya o‘z zaxirasida 300 ta tankka ega.

Janob Melnikning so‘zlariga ko‘ra, yetkazib berilgan tanklar sonini “Germaniyaning o‘zini mudofaa qilish qobiliyatiga putur yetkazmasdan” uch barobarga oshirish mumkin.

“Hal qiluvchi hujum uchun har bir Leopard 2 tankining qadri oltinga tengdir”, — deb qo‘shimcha qildi Andrey Melnik.

Vazir o‘rinbosari, shuningdek, Ukraina armiyasiga yana 60 ta Marder piyoda askarlarining jangovar texnikasini topshirishni so‘radi.

Avvalroq Ispaniya Ukraina armiyasiga ta’mirlangan oltita Leopard tankini yuborgandi. Shvetsiya va Polsha ham nemis tanklarini Ukrainaga topshirish niyati haqida gapirgan. Gollandiya ham Ukraina uchun Leopard tanklarini sotib olmoqchi ekanligini ma’lum qilgan.