Buxoroda mahalladoshining behayo videolarini tarqatishini aytib, undan pul talab qilgan yigit ushlandi
Buxoro viloyati Qorako‘l tumanida mahalladoshining behayo videolarini tarqatishini aytib, undan pul talab qilgan yigit ushlandi. Bu haqda viloyat IIB axborot xizmati xabar berdi.
Unga ko‘ra, “Xo‘jakon” mahallasida yashovchi, 2003-yilda tug‘ilgan I.A. mahalladosh tengdosh qizning behayo videolarini tarqatish bilan qo‘rqitgan. U qizdan 1 500 000 so‘m miqdoridagi pulni talab qilib, agarda mazkur pulni bermasa, o‘zida mavjud bo‘lgan behayo va pornografik videolarini tarqatib yuborib, sharmanda qilishini aytgan.
Yigit 350 000 so‘m pulni olishga erishib, bu bilan ham kifoyalanmasdan qolgan 800 000 so‘m miqdoridagi pulni Buxoro shahar A.Somiy ko‘chasida olayotgan vaqtida ashyoviy dalillar bilan qo‘lga olingan.
Mazkur holat yuzasidan shahar IIO FMB tomonidan fuqaro I.A. ga nisbatan Jinoyat kodeksining 165-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
