Ilon Mask Leopard 2 nemis tanklarining zaif tomonini aytdi
Amerikalik milliarder Ilon Mask Ukraina Qurolli kuchlarining qarshi hujumi doirasida jang maydonidagi yo‘qotishlariga izoh berdi. Tegishli izoh milliarderning Twitter’dagi sahifasiga joylandi.
Uning so‘zlariga ko‘ra, Leopard 2 kabi oz sonli tanklarni tankga qarshi qurollar va minalar yordamida yo‘q qilish mumkin.
“Kichik miqdordagi tanklar tankga qarshi qurollar va minalar tomonidan osonlikcha yo‘q qilinadi”, — degan Mask.
Milliarder bunday tanklar “yo ko‘p” bo‘lishi, yoki umuman “bo‘lmasligi” kerakligini aytadi.
May oyi oxiri holatiga ko‘ra, G‘arb davlatlari Kiyevga 60 ga yaqin Leopard 2 tanklarini yetkazib bergan. Fevral oyida Germaniya Iqtisodiyot vazirligi Ukrainaga 178 tagacha Leopard 1A5 tanklarini berishni ma’qullagan.
Rossiya Mudofaa vazirligi Ukraina armiyasi Yujno-Donetsk va Zaporojye yo‘nalishlarida hujum uyushtirishga urinayotganda to‘rtta Leopard 2 ni yo‘qotganini aytmoqda. Bundan oldin ham nemis tanklari yo‘q qilingani haqida xabar berilgan. Biroq keyinchalik Rossiya Ukrainada Leopard tanklarini emas, kombaynlarni yo‘q qilgan bo‘lishi mumkinligi haqida ilgari surilgan.
