Ukraina qarshi hujumni vaqtincha to‘xtatishi mumkin — ISW
Urushni o‘rganish bo‘yicha Amerika tahliliy instituti (ISW) Ukrainadagi harbiy harakatlarning kunlik xulosasini taqdim etdi. Unda ekspertlar Ukraina qurolli kuchlari o‘z taktikasini qayta ko‘rib chiqish uchun hujum operatsiyalarini vaqtincha to‘xtatishi mumkinligini taxmin qilmoqda.
ISW ma’lumotlariga ko‘ra, 16-iyun kuni Estoniya harbiy razvedkasi rahbari Margo Grosberg yaqin yetti kun ichida Ukraina tomoni qarshi hujum faolligini kamaytirishi mumkinligini aytdi. Uning so‘zlariga ko‘ra, ukrainaliklar o‘z operatsiyalariga “ehtiyotkorlik va xotirjamlik bilan” yondashmoqda, chunki ular uchun ham insoniy, ham texnik resurslar “oltinga teng”.
Institutning ta’kidlashicha, qarshi hujumning to‘xtatilishi haqida 17-iyundagi The Wall Street Journal nashrida ham eslatib o‘tilgan. Materialga ko‘ra, Ukraina qo‘mondonligi “Rossiya pozitsiyalarini katta yo‘qotishlarsiz yorib o‘tishning usullarini” tahlil qilish uchun qarshi hujum harakatlarini to‘xtatishga qaror qilgan.
ISW ta’kidlashicha, Ukraina armiyasi o‘z zaxiralarining asosiy qismini hali jangga jalb qilmagan.
“Operativ pauzalar yirik hujumlarda tez-tez uchraydigan hodisadir va bu pauza Ukraina qarshi hujumining tugashini anglatmaydi”, — deb qo‘shimcha qildi ISW.
