Ukraina razvedkasi boshlig‘i Kirill Budanov o‘zining yaralangani haqidagi mish-mishlarga javob berdi
Ukraina Mudofaa vazirligi Razvedka bosh boshqarmasi boshlig‘i Kirill Budanov o‘zining yaralangani yoki o‘lgani haqida Rossiya OAVlarida tarqalgan mish-mishlarga izoh berdi. Harbiyning bayonotini Kyiv Post nashri chop etdi.
“Hozir Ukrainada o‘lmas qo‘mondonlarning maxsus otryadi shakllantirilmoqda — Valeriy Zalujniy, men, Stepan Bandera, Simon Petlyura, Ivan Mazepa. Shuning uchun, ruslar va ularning propogandachilari hali ko‘p asabiy, isterik muhitda ishlashiga to‘g‘ri keladi. Tunlari o‘lmas otryad Ukrainani bosib olishga intilayotgan ruslarning tushiga kirib, ularni dahshatga soladi”, — dedi Budanov.
15-iyun kuni Rossiya davlat agentligi “RIA Novosti” Kirill Budanov 29-may kuni Kiyevdagi Razvedka bosh boshqarmasi (GUR) binosiga Rossiya tomonidan berilgan zarbadan so‘ng og‘ir yaralangani haqida xabar berdi. Agentlikning Rossiya huquq-tartibot idoralaridagi manbasi Ukraina razvedkasidagi manbaga tayanib, raketa Budanov yonidagi ofisga tushganini da’vo qildi. Shundan so‘ng Budanov vertolyotda Polshadagi harbiy bazaga, u yerdan esa Berlindagi kasalxonaga evakuatsiya qilingani aytildi.
29-may kuni, ya’ni Budanov “yaralangan” kuni GUR Telegram-kanalida razvedka rahbari Ukrainaga raketa hujumi uchun Rossiyadan qasos olishga va’da bergan video chop etildi. 11-iyun kuni GUR kanalida razvedka boshlig‘ining yana bir videosi paydo bo‘ldi, unda Budanov kameraga jim qarab turadi. “Rejalar sukunatni yaxshi ko‘radi”, — deyiladi video ostidagi yozuvda.
“RIA Novosti”, shuningdek, 24-may kuni Ukraina Qurolli kuchlari Bosh qo‘mondoni Valeriy Zalujniy go‘yoki Rossiya raketasining hujumi oqibatida boshidan jarohat olgani, unga raketa parchalari tekkani, ortiq o‘z ishini bajara olmasligi haqida yozdi. Kiyevda bu ma’lumot rad etildi. Ukrainalik zobit va bloger Anatoliy Shtefan Valeriy Zalujniy ishtirokidagi videoni joylashtirdi va u 25-may kuni suratga olinganini aytdi.
