Amerikalik ayol boyligi va 2,5 million dollarlik hashamatli uyini mushuklariga meros qilib qoldirdi

Amerikalik Nensi Zauer 2,5 million dollarlik hashamatli uyi va butun boyligini mushuklariga vasiyat qilib qoldirdi.

Ayol o‘limidan keyin uning uy hayvonlari birgalikda yashashni davom ettirishlari kerak, deb hisoblagan. Chunki ular ayriliqni og‘ir qabul qilisharkan. Oxirgi mushuk u yerdan ketmaguncha ko‘chmas mulkni sotish taqiqlangan.

Bundan tashqari, Zauer mushuklarning barcha xarajatlarini umrining oxirigacha qoplab turish uchun mablag‘ ajratgan.

“Bu oziq-ovqat, davolanish va mushuklarni parvarish qilish uchun to‘lovlarga yetarli mablag‘. Ular hali yosh, endi beshga to‘ldi. Fors mushuklari qimmat va nozik bo‘ladi”, — degan Hayvonlarni himoya qilish jamiyati ijrochi direktori Sherri Silki.

Avvalroq nemis modelyeri Karl Lagerfeldning mushugi haligacha o‘ziga vasiyat qilib qoldirilgan 1,3 million funt sterling miqdoridagi merosni olmagani xabar qilingan edi.