Andres Inyesta 5 yillik faoliyatdan so‘ng “Vissel Kobe”ni tark etdi

Yaponiyaning “Vissel Kobe” jamoasi Andres Inyesta bilan xayrlashayotganini ma’lum qildi.

Inyesta “Konsadole Sapporo”ga qarshi bahsda (1:1) “Vissel Kobe”dagi so‘nggi o‘yinini o‘tkazdi. Futbolchi 57-daqiqada maydonni tark etdi. Ispaniyalik yarim himoyachi sharafiga maxsus xayrlashuv marosimi o‘tkazildi. 

“Andres “Barselona”dan bizning klubga o‘tganidan so‘ng 5 yil mobaynida birgalikda kurashdik. U maydonda mo‘jizaviy o‘yin ko‘rsatardi. Ilk sovrin, ilk xalqaro o‘yinlar...

Inyesta “Vissel Kobe” tarixida yangi sahifa ochdi. Uning o‘yini hech qachon unutilmaydi. 

Biz bilan 5 mavsum o‘ynaganing uchun rahmat, Andres”, — deyiladi klub xabarida. 

Inyesta 2018-yildan buyon “Vissel Kobe”da harakat qilib kelayotgan edi. Futbolchi klub bilan birgalikda Yaponiya Kubogi (2019) va Yaponiya Superkubogida (2020) zafar quchgan.