Rossiyada o‘zbekistonlik erkak hamyurtini pichoqlab o‘ldirdi 

Rossiyaning Astraxan shahrida o‘zbekistonlik erkak hamyurtini pichoqlab o‘ldirdi. Bu haqda “Moskovskiy komsomolets” xabar berdi.

Ma’lum qilinishicha, 28-iyunga o‘tar kechasi Astraxandagi kafelardan birida O‘zbekistonning uch nafar fuqarosi janjallashgan. Shundan keyin konflikt mushtlashuvga aylangan.

Keyinchalik muhojirlar kafeni tark etib, uyiga ketgan. Biroq ulardan biri o‘rtog‘iga nisbatan shaxsiy xusumati bo‘lgan, deyiladi xabarda. U hamyurti uxlaganidan keyin bo‘yniga bir necha marta pichoq tortgan. Erkak olgan tan jarohatlari oqibatida voqea joyida vafot etgan.

Do‘stini o‘ldirgandan so‘ng, erkak voqea joyidan qochib ketgan. Huquq-tartibot idoralari xodimlari uni qo‘lga olgan. Hozirda huquq-tartibot idoralari xodimlari voqeaning barcha holatlarini aniqlamoqda, tergov davom etmoqda.