Nurafshondagi tug‘uruqxonada vafot etgan ona va bola ishi bo‘yicha to‘liq tafsilotlar ochiqlandi
Toshkent viloyati Nurafshon shahridagi tug‘uruqxonada ayol chaqalog‘i bilan vafot etgani haqida xabar berilgan edi. SSV holat yuzasidan ma’lumot berdi.
Aniqlanishicha, 2023-yil 14-iyul soat 06:45 da Nurafshon shahar tibbiyot birlashmasining tug‘uruq bo‘limiga O‘rta Chirchiq tumani “Gulobod” MFYda yashovchi, 1993-yil 28-fevralda tug‘ilgan fuqaro M.D. murojaat qilgan. Bemor muassasaga singlisi tomonidan olib kelinganida ahvoli o‘ta og‘ir, terisi rangpar, sovuq ter bosgan, arterial qon bosimi 70/40 mm simob ustuniga teng, tana harorati 39,5 daraja, tananing shilliq qavatlari ko‘kimtir rangda, karaxt va savollarga aniq javob bera olmaydigan holatda bo‘lgan.
Qabul vaqtida unga homiladorlik-2, 38 hafta tug‘uruq, sepsis, I-II darajali septik shok dastlabki tashxisi qo‘yilib, zudlik bilan reanimatsiya bo‘limiga yotqizilgan. Shundan so‘ng navbatchi brigada akusher-ginekologlari hamda anesteziolog-reanimatolog tomonidan barcha zarur reanimatsion muolajalar amalga oshirilgan.
Dastlab ikki tomonlama periferik vena, keyinchalik markaziy vena kateterlanib, markaziy venoz bosim past bo‘lgani uchun shokka qarshi, yurak-qon tomir, nafas olish tizimini qo‘llab-quvvatlovchi tezkor chora-tadbirlar o‘tkazilgan. Shuningdek, bemor o‘pkaning sunʼiy ventilyatsiyasiga o‘tkazilgan. Biroq markaziy vena orqali bajarilgan massiv infuzion muolajalar va jadal reanimatsion terapiyaga qaramay, uning gemodinamikasi tiklanmagan.
Oqibatda 2023-yil 14-iyul soat 07:30 da bemorda klinik o‘lim holati qayd etildi. Navbatchi anesteziolog-reanimatolog shifokorlar tomonidan yurak-o‘pka reanimatsiyasi 40 daqiqa davomida olib borildi, lekin yurak faoliyati tiklanmadi. Oqibatda soat 08:10 da bemorda biologik o‘lim kuzatildi. Ushbu holat yuzasidan sud-tibbiy ekspertizasi tayinlandi.
