Sadir Japarov energetika sohasida favqulodda holat joriy qildi
Qirg‘iziston prezidenti Sadir Japarov “Qirg‘iziston Respublikasi energetika sohasidagi favqulodda vaziyat to‘g‘risida”gi farmonni imzoladi. Bu haqda prezident matbuot xizmatiga tayanib, Tazabek xabar berdi.
Energetika sohasida favqulodda holat joriy etish to‘g‘risidagi taklif 20-iyul kuni energetika vaziri Taalaybek Ibrayev tomonidan ilgari surilgandi.
Farmon Qirg‘izistonda iqlim muammolari, Norin daryosi havzasida suv oqimining pastligi va energiya iste’molining tez sur’atlar bilan o‘sib borayotgani sharoitida ishlab chiqarish quvvatlarining yetishmasligi bilan bog‘liq energetika inqirozidan olib chiqish bo‘yicha shoshilinch choralar ko‘rishga qaratilgan.
Favqulodda holat 2023-yil 1-avgustdan 2026-yil 31-dekabrgacha amal qiladi. Qirg‘iziston energetika vaziri ushbu farmonning lozim darajada bajarilishi uchun javobgar bo‘ladi.
