Rossiyada o‘zbekistonlik haydovchi yo‘lovchini urib, o‘ldirib qo‘ydi 

Rossiyaning Leningrad viloyatida o‘zbekistonlik haydovchi yo‘lovchini urib, o‘ldirib qo‘ydi. Bu haqda 78.ru xabar berdi.

O‘zbekiston fuqarosi 23 yoshda bo‘lib, Rossiya Jinoyat kodeksining 111-moddasi (badanga qasddan og‘ir shikast yetkazish, jabrlanuvchining o‘limiga olib kelish) bo‘yicha ayblanmoqda. 

Tergovga ko‘ra, O‘zbekiston fuqarosi Murino shahriga yo‘lovchini olib ketish uchun kelgan. Jabrlanuvchi salonda o‘tirishdan bosh tortgan. Shundan keyin taksi haydovchisi erkakni og‘zaki ravishda “majburlashga” harakat qilgan.

Oqibatda yo‘lovchining jahli chiqib, taksi haydovchisini urgan. O‘zbekiston fuqarosi ham xuddi shunday javob qaytargan. Erkak yerga yiqilib, olgan jarohatlaridan vafot etgan. 

Ta’kidlanishicha, haydovchi yo‘lovchining o‘lganini tushungach, politsiyachilarni kutgan va ular uni bo‘limga olib ketgan. Hozirda u ikki oyga hibsga olingan.