O‘zbekistonning ayrim hududlaridagi zapravkalarda gaz narxi oshgani haqida xabarlar tarqaldi
O‘zbekistonning ayrim hududlaridagi gaz zapravkalarda bir kub gaz uchun belgilangan narx oshgani haqida xabarlar tarqaldi. Energetika vazirligi ijtimoiy tarmoqlarda tarqalgan xabarlar yuzasidan tushuntirish berdi.
Unga ko‘ra, Namangan viloyatidagi barcha metan zapravkalarga ularning talablariga asosan belgilangan limitga ko‘ra, tabiiy gaz to‘liq yetkazib berilgan. Videoda tarqalgan holatdagi zapravka esa berilgan oylik limitni ishlatib bo‘lgan. Bugun soat 00:00 dan yangi oy boshlanadi va mazkur zapravkaga gaz yetkazib berish yo‘lga qo‘yiladi.
Qayd etilishicha, metan zapravkalarda sotiladigan bir kub gaz uchun belgilangan narx oshgani yo‘q.
“Agar zapravkalarda gaz narxining asossiz oshirilishi holatlariga guvoh bo‘lsangiz, Raqobatni rivojlantirish va isteʼmolchilar huquqlarini himoya qilish qo‘mitasining 1159 raqamli ishonch telefoniga qo‘ng‘iroq qilishingiz mumkin”, — deyiladi vazirlik xabarida.
