Surxondaryoda hokim oylik maoshidan jarimaga tortildi

Surxondaryo viloyatida navbatdagi tadbirkorlar qabulida ayrim masʼullarga choralar ko‘rildi. Bu haqda viloyat hokimligi axborot xizmati xabar berdi.

Unga ko‘ra, viloyat hokimi Ulug‘bek Qosimovning “Tadbirkorlar qabuli” onlayn formatda o‘tkazilmoqda. Bugun joriy hafta uchun rejalashtirilgan qabul avvalida hududlarda tadbirkorlar bilan ishlash, qabulni samarali tashkil etish borasida yo‘l qo‘yilgan kamchiliklar tanqid qilinib, ayrim masʼullarga nisbatan keskin choralar ko‘rildi. 

Jumladan, Jarqo‘rg‘on tumani hokimi oylik ish haqqidan 40 foiz jarimaga tortildi. Viloyat Savdo-sanoat palatasi boshlig‘iga hayfsan berildi va viloyat prokuroridan prokuraturaning masʼul xodimiga chora ko‘rish so‘raldi.

Bundan tashqari Jarqo‘rg‘on tumani hokimining birinchi o‘rinbosari egallab turgan lavozimidan ozod etildi va tumanda viloyat ishchi guruhi tomonidan jismoniy va yuridik shaxlarning murojaatlari ijrosi yuzasidan monitoring o‘tkazilishi belgilandi.

Shuningdek, Qishloq qurilish bank, Turonbank, Xalq bankining viloyat filiali rahbarlari, Kadastrlar palatasi viloyat boshqarmasi boshlig‘iga ogohlantirish berildi. Tadbirkor murojaatini o‘rganib, hal etish chorasini ko‘rmagan Qishloq qurilish bankning kreditlash bo‘limi boshlig‘i ishdan olindi.

Shundan so‘ng, viloyat rahbari videokonfrensaloqa tarzida hududiy studiyalardan ishtirok etayotgan 55 nafar tadbirkorning 64 ta murojaatini tingladi.

• Ko‘tarilgan masalalarning 15 tasi qabul davomida ijobiy hal etildi.
• 49 ta murojaat qo‘shimcha o‘rganib chiqish va hal etish choralarini ko‘rish vazifasi bilan masʼullarga yo‘naltirildi.