Sirdaryodan Suriyadagi terroristik tashkilot safiga chiqishni rejalashtirgan shaxs qo‘lga olindi
Sirdaryo viloyatidan Suriyadagi terroristik tashkilot safiga chiqishni rejalashtirgan shaxs qo‘lga olindi, deb xabar bermoqda viloyat IIB axborot xizmati.
Unga ko‘ra, holat DXX Sirdaryo viloyati bo‘yicha boshqarmasi va Sirdaryo viloyati Ichki ishlar boshqarmasi tomonidan hamkorlikda o‘tkazilgan tezkor tadbirlar natijasida aniqlangan. Sirdaryo viloyatida yashovchi, R.A.ning Suriyadagi terroristik tashkilot tarafdorlari safiga chiqib ketishi oldi olindi.
Xususan, R.A. 2017—2021-yillarda Rossiyaning Sankt-Peterburg shahrida ishlashi davomida internet orqali Suriyadagi terroristik tashkilot aʼzolarining taʼsiriga tushgan. U Telegram’da yoshlarga ekstremistik g‘oyalarni targ‘ib qiluvchi audio va video materiallarni jo‘natib, ularni yollash va yoshlarni Turkiya orqali Suriyaga jo‘natish bilan shug‘ullangan. Shuningdek, Turkiya orqali Suriyadagi terroristik tashkilot safiga chiqib ketishi vaqtida ushlanib, O‘zbekistonga olib kelindi.
Hozirda Jinoyat kodeksining tegishli moddalari bilan qo‘zg‘atilgan jinoyat ishi doirasida tergov harakatlari olib borilmoqda.
