Surxondaryodagi bog‘chada qizaloq karavotdan yiqilib, shifoxonaga olib ketildi

Surxondaryo viloyati Sherobod tumanidagi bog‘chalarning birida qizaloq karavotdan yiqilib, shifoxonaga olib ketildi. 

Ijtimoiy tarmoqlarda bog‘chada bolani urib, jag‘ va lab qismini yirtib yuborishgani haqida xabarlar tarqalgan. Tarbiyachining so‘zlariga ko‘ra, qizaloq kaltaklanmagan, karavotdan o‘z ehtiyotsizligi oqibatida yiqilib tushgan. 

“Karavotdan yiqilib ketdi. Tarmoqlarda tarqalgan narsa yolg‘on. Tepadan iloji boricha o‘zimiz tushirishga harakat qilyapmiz”, — deydi tarbiyachi. 

Shuningdek, qizning buvisi ham bog‘chaga e’tirozi yo‘qligini, nabirasi o‘zi yiqilib tushganini aytdi. Viloyat Maktabgacha va maktab ta’limi boshqarmasi ham qizaloq behosdan yiqilganini bildirgan. Uning yiqilishi oqibatida iyak va lab qismi jarohatlangan. Tarbiyachi tomonidan birinchi yordam ko‘rsatilgan. 

O‘rganish davomida ma’lum bo‘lishicha, qizaloqning ahvoli hozirda yaxshi. Ota-onasining ham e’tirozi yo‘q. Tuman Maktabgacha va maktab ta’limi bo‘limi tomonidan 3-sonli oilaviy MTTga ogohlantirish xati yuborildi.