O‘zbekiston fuqarolari Saudiya Arabistoniga elektron viza olish imkoniga ega bo‘ldi

Saudiya Arabistoni yana 8 ta davlatga elektron viza berish xizmatini taqdim etdi. Bu haqda Saudiya turizm vazirligi xabar berdi.

Bungacha Saudiya Arabistoniga kirishda 49 ta davlat fuqarolari elektron viza tartibidan foydalana olar edi. Endilikda ular qatoriga Albaniya, Ozarbayjon, Gruziya, Qirg‘iziston, Maldiv orollari, Janubiy Afrika, Tojikiston va O‘zbekiston qo‘shildi.

O‘zbekistonliklar 146 dollar evaziga Qirollik turizm vazirligining maxsus portali orqali onlayn viza olishi mumkin.

Ushbu viza bilan yil davomida Umra hamda mamlakat bo‘ylab sayohat qilish mumkin bo‘lib, amal qilish muddati 90 kunni tashkil qiladi.

Elektron viza Haj qilish, Saudiya Arabistonida yashash, ishlash huquqini bermaydi.

Ma’lumot uchun, 2023-yil 1-yanvardan O‘zbekistonda Saudiya Arabistoni fuqarolari uchun 30 kunlik vizasiz rejim joriy qilingan.