Bashar Asad Erdo‘g‘on bilan uning shartlari asosida uchrashishdan bosh tortdi

Suriya prezidenti Bashar Asad Turkiya prezidenti Rajab Toyyib Erdo‘g‘on bilan uning shartlari asosida uchrashmasligini aytdi. Asad “Turkiya tomonidan Suriyaning shimoliy hududlari okkupatsiya qilinganini” tan olish niyatida emasligini ta’kidladi.

“Erdo‘g‘on bilan uchrashuv Anqara belgilagan shartlar asosida o‘tmaydi. Hozirgi vaziyatda u bilan muzokaraga kirishish Turkiya tomonidan Suriyaning shimoliy hududlari okkupatsiya qilinganini tan olishga teng bo‘ladi”, — deb o‘z qarorini tushuntirdi Asad Sky News Arabia telekanaliga bergan intervyusida.

Suriya prezidenti mart oyida turk qo‘shinlari mamlakatni tark etganidan keyingina Erdo‘g‘on bilan uchrashishini aytgan edi. Uning fikricha, bunday muzokaralar Suriyadagi harbiy mojaroga chek qo‘yishi kerak.

May oyida Moskvada Rossiya, Turkiya, Suriya va Eron tashqi ishlari vazirlari uchrashuvi bo‘lib o‘tdi. Uchrashuvda Turkiya va Suriya munosabatlarini normallashtirish bo‘yicha “yo‘l xaritasi”ni ishlab chiqishga kelishib olingandi.