Eronda bir ayolni guruh bo‘lib zo‘rlagan besh erkak qatl etildi

Eronning Marand shahrida bir ayolni guruh bo‘lib zo‘rlagan besh erkak qatl qilindi. Bu haqda Hasht-e Subh Daily xabar berdi.

Mamlakat Oliy sudi tomonidan e’lon qilingan tegishli hukm 9-avgust kuni amalga oshirilgan. Sud 2022-yili bir ayol o‘g‘irlab ketilganidan keyin besh erkak tomonidan guruhli ravishda zo‘rlanganini ma’lum qildi.

Hibsga olingan shaxslar so‘roq paytida o‘z jinoyatlariga iqror bo‘lgan. Natijada ular o‘lim jazosiga hukm qilingan va bu Eron Oliy sudi tomonidan ma’qullangach, amalga oshirilgan.

Inson huquqlari tashkilotlarining munosabatiga qaramay, Eron jinoyatchilarni qatl etishda davom etmoqda.

Eronda qatllarning davom etishidan xavotir bildirgan Amnesty International tashkiloti mamlakatda 5 oy ichida birgina giyohvand moddalar bilan bog‘liq jinoyatlar uchun 173 kishi qatl etilganini bildirdi.

Eronda 2022-yil kamida 582 kishi qatl etilgan. Bu 2015-yildan beri eng yuqori ko‘rsatkichdir. Barcha qatlning 88 foizdan ortig‘i rasmiylar tomonidan rasman e’lon qilinmagan.