Samarqandda noqonuniy qurol saqlab kelganlarning quroli olib qo‘yildi

Samarqand viloyatining Oqdaryo tumanida noqonuniy qurol saqlab kelganlarning qurollari olib qo‘yildi. Bu haqda viloyat IIB axborot xizmati xabar berdi.

Maʼlum qilinishicha, viloyatning Oqdaryo tumanida tezkor-profilaktik tadbirlar o‘tkazilgan.

Olingan tezkor maʼlumotlarga asosan, Samarqand viloyat IIB Tezkor-qidiruv xizmati va DXX viloyat boshqarmasi xodimlari hamkorligida Oqdaryo tumani hududida tezkor tadbirlar o‘tkazildi. “Mustaqillik” mahallasi Bobur ko‘chasida yashovchi fuqaro X.S. uyida noqonuniy ravishda pnevmatik to‘pponcha saqlab kelayotgani maʼlum bo‘ldi. Shuningdek, “Pichoqchi” mahallasi Karki qishlog‘ida yashovchi fuqaro Q.B.ning esa IJ-40 pnevmatik quroli borligi aniqlandi. Va qurollar tegishli tartibda hujjatlashtirib olindi, — deydi viloyat IIB axborot xizmati rahbari Jahongir Sagdullayev.

Qo‘shimcha qilinishicha, holatlar yuzasidan tergovga qadar tekshiruv harakatlari olib borilmoqda.