O‘zbekistonda xususiy va davlat bog‘chalari soni maʼlum qilindi

Maktabgacha taʼlim agentligi O‘zbekistonda faoliyat yuritayotgan maktabgacha taʼlim tashkilotlari (MTT) sonini maʼlum qildi.

2023-yilning 1-avgust holatiga ko‘ra, respublikada jami 30 792 ta bog‘cha faoliyat ko‘rsatyapti. Shundan davlatga qarashli MTTlari soni 6 734 ta, nodavlat bog‘chalar 24 058 tani tashkil etadi.

Taqqoslash uchun, 2017-yilda mamlakatda 5 211 ta bog‘cha bo‘lgan. 2018-yilda bu raqam 7104 taga, 2019-yilda 13 530 taga, 2020-yilda 18 254 taga yetgan. 2021-yilga kelib bog‘chalar soni keskin ko‘paygan va 27 609 tani tashkil etgan. 2022-yilda esa bu ko‘rsatkich 29 420 tagacha ortgan.

Maʼlum qilinishicha, agentlikka 2023-yilning 1- yarim yilligida tadbirkorlar tomonidan bog‘chalar ochish masalasida 5 486 ta arizalar kelib tushgan. Shundan 2 089 ta loyiha maʼqullangan, 1 846 ta loyihalar bilan bitim imzolangan. Natijada 59 072 ta yangi quvvat, 4 615 ta yangi ishchi o‘rin yaratildi.

“Yarim yil mobaynida quvvati 41 920 nafar bolani qamrab olgan 1 310 ta oilaviy MTTlar o‘z faoliyatini boshladi”, — deyiladi manba maʼlumotida.

Shuningdek, bu 6 oy ichida respublikadagi 740 ming nafarga yaqin tarbiyalanuvchilarni qamrab olgan 21 mingdan ortiq nodavlat (jumladan, oilaviy MTT) maktabgacha taʼlim tashkilotlariga davlat budjeti mablag‘lari hisobidan 1,2 trillion so‘m miqdorda subsidiyalar ajratilgan.