“Qurollaringizni Kiyev rejimiga qarshi ishlating yoki taslim bo‘ling” — Mariya Zaxarova ukrainalik harbiylarga murojaat qildi

Rossiya Tashqi ishlar vazirligining rasmiy vakili Mariya Zaxarova Ukraina Qurolli kuchlari askarlariga qurollarini Kiyev rejimiga qarshi ishlatishni yoki taslim bo‘lishni tavsiya qildi. Zaxarovaning murojaati Rossiya TIV saytiga joylashtirilgan.

“Biz o‘z mamlakatini bosib olgan bandit xuntaning jinoiy mohiyatini tushunadigan ukrainalik harbiy xizmatchilarga murojaat qilib aytmoqchimizki, o‘z qurolingizni hukumat tepasidagilarga qarshi ishlating yoki qo‘shinlarimizga taslim bo‘ling”, degan Zaxarova.

Zaxarovaning qo‘shimcha qilishicha, taslim bo‘lgan Ukraina harbiylariga insoniy munosabat kafolatlanadi.

Shuningdek, u Kiyevning jinoyatchi rejimi NATO qurollaridan foydalangan holda Rossiya shahar va qishloqlarini o‘qqa tutishni to‘xtatmayotganini ta’kidladi.

“Ularning harakatlari tinch aholi, jumladan, bolalar orasida qurbonlarni keltirib chiqarmoqda”, — dedi Rossiya Tashqi ishlar vazirligining rasmiy vakili.